Distansya

Kanina ko pa tinititigan ang

batok mo

mula sa likuran

o, gusto kong tabihan ka habang nagkakape 

habang nagkukuwento tungkol sa mga karanasan ko sa kanayunan 

tungkol sa ating pagkabata

gusto kong malaman kung gusto mo rin ba ng mga tula 

(gusto mo bang sulatan kita ng tula)

pareho ba tayo ng binabasa

pareho ba tayong may nunal 

sa paa

gusto kong hawakan ang iyong kamay

ikumpara ito sa init ng tasa ng kape

sa init ng aking puso

gusto kong sabihin sa iyo na kaya kong baliktarin ang mga salita, piliting huwag gumamit ng mga tuldok at comma

para lang sabihing

mahal na mahal kita

pero tanging titig lang mula sa likuran ang kaya kong gawin

nang hindi mo pa nalalaman.

###